ಮೋಹಿತನ ೧೦ ಕವಿತೆಗಳು

 

 

೧

ನನ್ನ ಒಳ್ಳೆಯತನ ಮತ್ತು ನಿನ್ನ ಚಂದ

ನಿನ್ನ ಸಂಗೀತ ನನ್ನ ಕವಿತೆ

ಇದೆಲ್ಲ ಎಷ್ಟೊಂದು ಸುಳ್ಳು!

ನನ್ನ ಮೂಗು ನಿನ್ನ ಕಾಲ ಬೆರಳನ್ನು ಘ್ರಾಣಿಸುತ್ತಿರುವುದು

ಎಷ್ಟು ಹೊತ್ತಿಂದ ಎಂಬುದನ್ನೂ ಮರೆತಿರುವುದು

೨

ನಿನ್ನ ಗಂಡನ ಕೈ ಬೆರಳಿನ ಸಿಗರೇಟಿನ ವಾಸನೆ

ನಿನ್ನ ಕಿವಿಯ ಹಿಂದುಗಡೆ

ನಿನ್ನ ಮಗುವಿನ ಜೊಲ್ಲಿನ ಪರಿಮಳ ನಿನ್ನ ಎದೆಯ ಮೇಲೆ

ಹಿಂದೆ ನಾನೆಲ್ಲೋ ಮುಡಿಸಿದ್ದ ಕೇದಗೆಯ ಕಂಪು

ಈಗಲೂ ನಿನ್ನ ತೊಡೆಯ ನಡುವೆ

೩

ಅದೆಲ್ಲ ಹೋಗಲಿ ಬಿಡು
ಈ ನಡು ಹಗಲಿನ ಆಕಾಶ ನೋಡು

ಮತ್ತು ಕೆಳಗೆ ನಿನ್ನ ದೇಹ ನನ್ನನ್ನು

ಸುತ್ತಿಕೊಂಡಿರುವುದು.ಇನ್ನು ಯಾವತ್ತು

ನಾವು ಹೀಗೆ ಆಕಾಶದ ಕೆಳಗೆ ಕೆಟ್ಟ

ಹಾವುಗಳ ಹಾಗೆ ಬುಸುಗುಡುವುದು?

೪

ನನ್ನನ್ನು ನೀನು ಅಂದು ಕೊಂಡಿರುವುದು
ನಿನ್ನನ್ನು ನಾನು ಧ್ಯಾನಿಸುವುದು
ಇಬ್ಬರಿಗೂ ಮರೆತುಹೋಗುವುದು
ಕಂಡೊಡನೆ ಕೂಡುವುದು
ಉಣ್ಣುವುದು ಮತ್ತು ನಿನ್ನ ಮುಡಿಯ
ಬಿಡಿಸಿ ಕಟ್ಟುವುದರಲ್ಲಿ
ಸಂಜೆಯಾಗಿರುವುದು.

೫
ನೀನು ಹೊರಟ ಮೇಲೆ ಏನೋ ಬೇಕೆನಿಸುವುದು
ಅದು ಅವಳಲ್ಲಿದೆಯೆನಿಸುವುದು.
ಆ ಬಿಕ್ಷುಕಿಯಲ್ಲಿಆ ದೇವತೆಯ ಮುಖ ಹೊತ್ತ
ಬಾಲಕಿಯಲ್ಲಿ ಅಲ್ಲ ಆ ಮರಳಲ್ಲಿ ಕಾಲು ಊರಿರುವ
ಬಾಲಕನಲ್ಲಿ ಅದು ಇದೆ ಅನಿಸುವುದು

೬
ನನ್ನ ಬೆರಳ ತುದಿಯ ಬೆಂಕಿ
ನಿನ್ನ ಕಿಬ್ಬೊಟ್ಟೆಯ ಕಾವು
ಮತ್ತು ಇದು ಯಾವುದೂ ಅರಿವಿಲ್ಲದೆಯೆ
ನಗುವ ಮಗು.
ಹೇಳು ನಮ್ಮ ಈ ಹಾದರದ
ಹುಚ್ಚು ಬಿಡಿಸುವ ಮದ್ದು ಯಾವುದು?

೭
ತೀರಿ ಹೋದ ಆತ್ಮಗಳನ್ನು ಉಸಿರಾಡುವುದು
ಬರಲಿರುವ ಜೀವಗಳನ್ನು ಕಾಣುವುದು
ಇತಿಹಾಸ ತರ್ಕ ಕಾಲಜ್ನಾನ ಕಾವ್ಯ
ಇದೆಲ್ಲಕ್ಕು ಮಿಗಿಲು ನಿನ್ನನ್ನು ಕೂಡುವುದು
ಎನ್ನುವುದು ಎಷ್ಟೊಂದು ದೊಡ್ಡ ಸುಳ್ಳು.
ಈ ಹೊತ್ತಲ್ಲಿ ಸುಳ್ಳು ನುಡಿಯುವುದೂ
ನಮಗಿಬ್ಬರಿಗೆ ಏನನ್ನೆಲ್ಲಾ ನೀಡುವುದು.

೮

ಬೇಕಂತಲೇ ಪಡುವ ಒಂಟಿತನ
ಬೇಕಂತಲೇ ಬಿಡುವ ಈ ನೀಳ ನಿಟ್ಟುಸಿರು
ನಿನ್ನ ಕಾಲಸಪ್ಪಳಕ್ಕಾಗಿ ಕಾಯುವ ಈ ಪರಿಎಲ್ಲ ಸುಮ್ಮನೆ.
ನನ್ನ ಬೇಟೆಯ ಮನಸು,ಕಂಡೊಡನೆ ಜಿಗಿದು ನಿನ್ನ ಗುಂಡಿಗೆಗೆ
ನಾಲಗೆಯಿಡಬೇಕೆನ್ನುವ ಹಸಿವು ಇದೂ ಸುಮ್ಮನೆ.
ನಿಜಕ್ಕೂ ಗೊತ್ತಿಲ್ಲ ನಿನ್ನ ಕಂಡೊಡನೆ ತುಂಬಿಕೊಳ್ಳುವ ಎದೆ

ಏನನ್ನೂ ಅರಿಯಬಿಡುವುದಿಲ್ಲಸುಮ್ಮಗೆ

೯

ನೀ ಕೈ ತಿರುಗಿಸಿ ಹೊರಟ ಹೊತ್ತು
ಹೊಕ್ಕ ವೈರಾಗ್ಯಇನ್ನೂ ಬಿಟ್ಟಿಲ್ಲ
ನೀ ಬೇಡವೆಂದಮೇಲೆ ಬೇಡವೆಂದುಕೊಂಡದ್ದು
ಇನ್ನೂ ತಿರುಗಿ ಸಿಕ್ಕಿಲ್ಲ
ನೀ ಹೊರಡುವ ಮುನ್ನ ಅಂದದ್ದು ನಿಜವೆನಿಸಿದ್ದು
ಕೊಂಚ ಹೊತ್ತು ಮಾತ್ರ.ಮತ್ತೆ ಈ ಹೊತ್ತಿನವರೆಗೂ
ಹೊಕ್ಕಿರುವ ವೈರಾಗ್ಯ ಇದಕೆ ಯಾವ ಮಾತೂ
ಅರಿವಾಗುವುದಿಲ್ಲ.

೧೦
ನಾವು ಹೀಗಿರುವುದು
ದೈವಕ್ಕೆ ಎದುರು ಹೇಳುವುದು.
ಇದು ದೈವದ ಅಣತಿ
ಆಗಿರಲೂ ಬಹುದು.
ಇಲ್ಲವಾದರೆ ಯಾಕೆ ಕಳೆದ ಇರುಳು
ಎಲ್ಲಿಂದಲೋ ಗೋಚರಿಸಿದ ಅವಳು
ರೋಗಗ್ರಸ್ತೆ,ಸಿಡುಕಿ, ಮಾರಿಮುಖದವಳು
ದೇವತೆಯ ಹಾಗೆ ಕಾಣಿಸಿಕೊಂಡಳು?